Kumarathasan Karthigesu-பாரிஸ்
ஜூலை 26 ஆம் திகதி ஒலிம்பிக் தொடக்க விழாவுக்கு ஒருவாரம் முன்பாகப் பாரிஸ் நகரின் மையத்தில் 17 க்கும் மேற்பட்ட மெற்றோ மற்றும் RER ரயில் நிலையங்கள் மூடப்படவுள்ளன. அவற்றை விட வேறு சில நிலையங்கள் மாதக்கணக்காக மூடப்பட்டிருக்கும்.
தொடக்க விழா மற்றும் அதனுடன் தொடர்புடைய முக்கிய நிகழ்வுகள் நடைபெறவுள்ள நகரின் மையத்தில் பயங்கரவாத எதிர்ப்புப் பாதுகாப்பு வலயமாகக் (anti-terrorist protection perimeter) குறிக்கப்பட்டுள்ள பகுதிக்குள் அடங்குகின்ற ரயில் நிலையங்களே மூடப்படவுள்ளன.
பின்வரும் நிலையங்கள் ஜூலை 18 ஆம் திகதி முதல் மூடப்பட்டிருக்கும்.
- Tuileries (வழித் தடம்1), Concorde (1, 8, 12), Champs-Elysées Clémenceau (13, 1), Alma Marceau (9), Iéna (9), Trocadéro (6, 9), Passy (6), Quai de la Rapée (5), Cité (4), Javel (10).
- 7 வழித்தடத்தில்(Line 7) – செய்ன் நதிக்குக் கீழாகச் செல்லும் பகுதியில் Châtelet , Pont Marie , Pont Neuf ,மற்றும் Sully Morland ஆகிய நிலையங்களை ரயில்கள் பயணிகள் இன்றிக் கடக்கும்.
- RER C மார்க்கத்தில் Musées d’Orsay, Champ de Mars Tour Eiffel மற்றும் Pont de l’Alma ஆகிய நிலையங்கள் ஜூலை 18 முதல் 26 வரைக்கும் மூடப்படும்.
இதைவிட – இதே பகுதிகளைக் கடந்து செல்கின்ற பஸ்களும் வேறு பாதைகள் வழியே திருப்பி விடப்படும். அதேசமயம் 1,13 மெற்றோ வழித்தடங்களில் அமைந்துள்ள Champs-Elysées – Clémenceau நிலையம் ஜூலை முதலாம் திகதி முதல் செப்ரெம்பர் 21 ஆம் திகதி வரை – நீண்ட காலப்பகுதிக்கு – மூடப்பட்டிருக்கும். அதேபோன்று , Concorde ரயில் நிலையமும் ஜூன் 17 ஆம் திகதி முதல் செப்ரெம்பர் 21 ஆம் திகதிவரை மூடப்பட்டிருக்கும் என்று போக்குவரத்து அமைச்சின் இணையத் தளத்தில் தெரிவிக்கப்பட்டுள்ளது.
- ட்ராம் மார்க்கங்களிலும் சில தரிப்பிடங்கள் மூடப்படவுள்ளன.Porte d’Issy (T2) மற்றும் Porte de Versailles (T2, T3a) ஆகிய நிலையங்கள் ஜூலை 25 முதல் ஓகஸ்ட் 11 வரையும் , பின்னர் ஓகஸ்ட் 29 முதல் செப்ரெம்பர் 7 வரையும் இரு கட்டங்களாக மூடப்படும். T3b ட்ராம் வழித்தடத்தில் Colette Besson தரிப்பிடம் ஜூலை 27 முதல் ஓகஸ்ட் 10 வரையும் பின்னர் ஓகஸ்ட் 29 முதல் செப்ரெம்பர் 8 வரையும் மூடப்பட்டிருக்கும்.
