பல்வேறு பிரச்சினைகள் தொடர்பாக மருத்துவ பீட மாணவர் குழு கொழும்பில் ஒரு போராட்டத்தை நடத்தத் திட்டமிட்டுள்ளதாக தெரிவிக்கப்பட்ட உடனேயே, சுகாதார மற்றும் வெகுஜன ஊடகப் பிரதி அமைச்சர் டாக்டர். ஹன்சக விஜயமுனி, நேற்று (18) பிற்பகல் மருத்துவ பீட மாணவர் குழுவின் பிரதிநிதிகளை சுகாதார அமைச்சகத்திற்கு வரவழைத்து, அவர்களின் வேண்டுகோள்களை கேட்டறிந்து ஆலோசனை நடத்தினார்.
இதன்போது பட்டப்படிப்பை முடித்த மருத்துவ மாணவர்களை உள்ளகப் பயிற்சிக்கு நியமித்தல், புதிய நியமனங்கள் வழங்குதல், மற்றும் மருத்துவ சேவைகள் உட்பட சுகாதார சேவையை விரிவுபடுத்துதல் தொடர்பான பல பிரச்சினைகள் கலந்துரையாடப்பட்டன.
மேலும், சுகாதாரத் துறை தொடர்பாக மருத்துவ பீட மாணவர் நடவடிக்கைக் குழுவின் பிரதிநிதிகளால் முன்வைக்கப்பட்ட பிரச்சினைகள் குறித்தும் அமைச்சர் அந்த துறை சார்ந்த அதிகாரிகளுடன் விரிவாக கலந்துரையாடினார்.
முன் வைக்கப்பட்ட பிரச்சினைகள் மீது சம்பந்தப்பட்ட திணைக்களங்களின் கவனத்திற்கு கொண்டு வரவும் அத்துடன் மேற்கொள்ள வேண்டிய அடுத்தகட்ட நடவடிக்கைகள் குறித்து அதிகாரிகளுடனும் துறை சார்ந்த திணைக்களங்களுடனும் மேலும் கலந்துரையாடுவதற்கும் அமைச்சர் தமது உடன்பாட்டைத் தெரிவித்தார்.
இந்தக் கலந்துரையாடலில் மருத்துவ பீட மாணவர் குழுவின் பிரதிநிதிகள், சுகாதார மற்றும் வெகுஜன ஊடக அமைச்சகத்தின் சார்பில் மேலதிக செயலாளர் (நிர்வாகம்) ஐ. ஜி. இ. ஜனக கிட்சிறி, மேலதிக செயலாளர் (மருத்துவ சேவைகள்) குமார விக்ரமசிங்க, பிரதி பணிப்பாளர் நாயகம் (மருத்துவ சேவைகள்) டாக்டர் எச். எம். அர்ஜுன திலகரத்ன மற்றும் சிலர் பங்கேற்றனர்.