அறுகம்பேவின் பாதுகாப்பு தொடர்பில் பதில் பொலிஸ்மா அதிபர் பிரியந்த வீரசூரிய விசேட அறிக்கையொன்றை விடுத்துள்ளார்.
அதற்கமைய, நாட்டிலுள்ள அனைத்து வெளிநாட்டினரின் பாதுகாப்பும் உறுதிப்படுத்தப்பட்டுள்ளதாகவும், அது தொடர்பில் அனைத்து தூதரகங்களுக்கும் அறிவிக்கப்பட்டுள்ளதாகவும் அவர் குறிப்பிட்டுள்ளார்.
“மத்திய கிழக்கில் யுத்த சூழல் ஆரம்பமானதுடன், பயங்கரவாத செயற்பாடுகள் பல்வேறு தரப்பினருக்கும் பரவியிருந்தன. இலங்கைக்கும் ஏதாவது அச்சுறுத்தல் இருக்குமோ என்ற சந்தேகம் இருந்ததால், புலனாய்வு அமைப்புகள் அது தொடர்பாக மிகச் சிறப்பாக விசாரணை நடத்தினர். ஒக்டோபர் 07ஆம் திகதி இது தொடர்பான உளவுத்துறை எமக்கு கிடைத்தது.
சில வெளிநாட்டு பிரஜைகளை குறிவைத்து தாக்குதல் நடத்த தயாராக உள்ளதாக கடந்த 3 வாரங்களுக்கு முன்னர் ஜனாதிபதி தலைமையில் பாதுகாப்பு சபையில் பேசப்பட்டது. இது தொடர்பான அறிவுறுத்தல்களை பெற்றனர்.
அறிவுறுத்தல்களின்படி, வெளிநாட்டவர்களின் பாதுகாப்பு, அவர்கள் உள்ள இடங்களின் பாதுகாப்பு, மத வழிபாட்டுத் தலங்களுக்கு சிறப்பு பாதுகாப்புத் திட்டத்தின் கீழ் பொலிஸ், விசேட அதிரடிப்படை மற்றும் புலனாய்வு அதிகாரிகள் பாதுகாப்பு அளித்தனர்.
இந்த பாதுகாப்பு பணிக்காக நேற்று (22) முதல் விசேட பாதுகாப்பு திட்டம் ஆரம்பிக்கப்பட்டது.” என்றார்.