சட்டவிரோதமான முறையில் நாட்டிற்குள் கடத்தி வரப்பட்ட 60 இலட்சத்து 30 ஆயிரம் ரூபா மதிப்பிலான வெளிநாட்டு சிகரெட்டுகளுடன் சீனப் பிரஜை ஒருவர் இன்று (26) கட்டுநாயக்க சர்வதேச விமான நிலைய சுங்க அதிகாரிகளால் கைது செய்யப்பட்டுள்ளார்.
மலேசியாவின் கோலாலம்பூர் நகரிலிருந்து ‘எயார் ஏஷியா’ (AirAsia) விமான சேவைக்குச் சொந்தமான AK-047 எனும் விமானம் மூலம் இலங்கையை வந்தடைந்த 40 வயதுடைய சீனப் பிரஜை ஒருவரே இவ்வாறு கைது செய்யப்பட்டுள்ளார்.
சந்தேகநபர் தனது இரண்டு பயணப் பைகளுக்குள் சீனாவில் தயாரிக்கப்பட்ட 201 கார்ட்டூன்களில் அடைக்கப்பட்ட 40,200 சிகரெட்டுகளை நுட்பமான முறையில் மறைத்து வைத்து எடுத்து வந்துள்ளார்.
இவ்வாறு பறிமுதல் செய்யப்பட்ட சிகரெட்டுகளின் மொத்த சந்தைப் பெறுமதி 60 இலட்சத்து 30 ஆயிரம் ரூபா என சுங்க அதிகாரிகள் கணிப்பிட்டுள்ளனர்.
விமான நிலையத்தின் வருகை முனையத்தில் அறிவிக்கப்பட வேண்டிய பொருட்கள் எதுவும் இல்லை என்பதைக் குறிக்கும் “பச்சை வழி” (Green Channel) ஊடாக சந்தேகநபர் தப்பிச் செல்ல முயன்றபோது, சுங்க அதிகாரிகளுக்கு ஏற்பட்ட சந்தேகத்தின் பேரில் மேற்கொள்ளப்பட்ட தீவிர சோதனையிலேயே இச்சிகரெட் தொகை கண்டுபிடிக்கப்பட்டது.
இலங்கைக்குள் உரிய சுங்க வரி செலுத்தாமல் வெளிநாட்டுச் சிகரெட்டுகளைக் கொண்டுவருவது சட்டப்படி தடை செய்யப்பட்ட குற்றமாகும்.
இச்சம்பவம் தொடர்பில் கைது செய்யப்பட்ட சீனப் பிரஜையிடம் கட்டுநாயக்க விமான நிலைய சுங்க அதிகாரிகள் மேலதிக விசாரணைகளை மேற்கொண்டு வருவதுடன், பறிமுதல் செய்யப்பட்ட சிகரெட்டுகளை அரசுடைமையாக்குவதற்கும் அபராதம் விதிப்பதற்குமான சட்ட நடவடிக்கைகளை முன்னெடுத்து வருகின்றனர்.