யாழ்ப்பாணம், காரைநகர் பகுதியில் வெளிநாடுகளில் இருந்து வருகை தந்தோரின் வீடுகளை இலக்கு வைத்து தொடர்ச்சியாக மேற்கொள்ளப்பட்டு வந்த கொள்ளைச் சம்பவங்களுடன் தொடர்புடைய இரண்டு இளைஞர்கள், யாழ். மாவட்ட குற்றத்தடுப்புப் பிரிவு பொலிஸாரால் இன்று (14) அதிரடியாகக் கைது செய்யப்பட்டுள்ளனர்.
காரைநகர் பகுதியில் வெளிநாடுகளில் வசித்துவிட்டு தற்காலிகமாக தாயகம் திரும்பியவர்களின் வீடுகளைக் கண்காணித்து இந்தத் திருட்டுச் சம்பவங்கள் அரங்கேற்றப்பட்டு வந்துள்ளன. அந்த வகையில், காரைநகரிலுள்ள வீடொன்றில் புகுந்த திருடர்கள், அங்கிருந்த 1,600 கனேடிய டொலர் பணம், ஒரு சோடி தங்கக் காப்பு மற்றும் கடவுச்சீட்டு என்பவற்றைக் கொள்ளையடித்துச் சென்றுள்ளனர். இதனைத் தொடர்ந்து, மற்றொரு வீட்டினுள்ளும் புகுந்து 400 யூரோ வெளிநாட்டு நாணயம் மற்றும் இலங்கை மதிப்பிலான ஒரு இலட்சம் ரூபா ரொக்கப் பணம் ஆகியவற்றைத் திருடிச் சென்றுள்ளனர்.
இந்தத் தொடர் திருட்டுச் சம்பவங்கள் குறித்து பாதிக்கப்பட்ட வீட்டின் உரிமையாளர்களால் பொலிஸ் நிலையத்தில் உத்தியோகபூர்வமாக முறைப்பாடுகள் பதிவு செய்யப்பட்டன. வெளிநாட்டுப் பணம் மற்றும் முக்கிய ஆவணங்கள் களவாடப்பட்டமையால், சம்பவத்தின் பாரதூரத் தன்மையைக் கருத்திற்கொண்டு யாழ்ப்பாண மாவட்ட குற்றத்தடுப்புப் பிரிவு பொலிஸார் விசாரணைகளைத் துரிதப்படுத்தினர். விசேட பொலிஸ் குழுவினர் முன்னெடுத்த சூட்சுமமான புலனாய்வு விசாரணைகளின் அடிப்படையில், இத்திருட்டுச் சம்பவங்களுடன் தொடர்புடைய சந்தேகநபர்கள் காரைநகர் பகுதியைச் சேர்ந்த 26 மற்றும் 27 வயதுடைய இரண்டு இளைஞர்கள் என்பது கண்டறியப்பட்டு, அவர்கள் இருவரும் இன்று கைது செய்யப்பட்டனர்.
கைது செய்யப்பட்ட சந்தேகநபர்களிடம் பொலிஸார் மேற்கொண்ட தீவிர விசாரணைகளை அடுத்து, அவர்களால் களவாடப்பட்ட வெளிநாட்டு மற்றும் உள்நாட்டுப் பணம், தங்கக் காப்பு என்பன பொலிஸாரால் முழுமையாக மீட்கப்பட்டுள்ளன. தற்போது கைது செய்யப்பட்டுள்ள இரு சந்தேகநபர்களிடமும் மேலதிக விசாரணைகளை முன்னெடுத்து வரும் குற்றத்தடுப்புப் பிரிவு பொலிஸார், விசாரணைகளின் நிறைவில் அவர்களை நீதிமன்றில் முற்படுத்துவதற்கான சட்ட நடவடிக்கைகளை மேற்கொண்டு வருகின்றனர்.