முன்னாள் இராணுவ புலனாய்வுப் பிரிவின் பிரதானியான ஜெனரல் சுரேஷ் சாலே பயங்கரவாத தடைச் சட்டத்தின் கீழ் கைது செய்யப்பட்டு, நீண்ட காலமாக சிறை வைக்கப்பட்டு அநீதியான முறையில் நடத்தப்பட்டு வருவதாக ஸ்ரீலங்கா பொதுஜன பெரமுனவின் பொதுச் செயலாளர் சாகர காரியவசம் தெரிவித்துள்ளார்.
பத்தரமுல்ல நெலும் மாவத்தையிலுள்ள கட்சி தலைமையகத்தில் நடைபெற்ற ஊடகவியலாளர் சந்திப்பிலேயே அவர் இந்த தகவலை வெளியிட்டார்.
இதன்போது சுரேஷ் சாலேயின் உருவப்படத்தை தனது பின்னணியில் காட்சிப்படுத்தியவாறு அவர் ஊடகங்களுக்கு கருத்து தெரிவித்தார்.
அங்கு அவர் மேலும் கருத்து தெரிவிக்கையில், சுரேஷ் சாலே என்பவர் தனது சொந்த திறமையினாலும், அர்ப்பணிப்பினாலும் இராணுவத்தில் ஜெனரல் பதவி வரை உயர்ந்த ஒரு தேசிய வீரன் ஆவார் என்றும், அவர் 30 ஆண்டுகளுக்கும் மேலாக நாட்டுக்காக அர்ப்பணிப்புடன் சேவையாற்றிய ஒரு மூத்த இராணுவ அதிகாரி ஆவார் என்றும் குறிப்பிட்டார்.
தற்போதைய அரசியல்வாதிகளைப் போல மக்களுக்கு பொய் கூறி, மக்களை ஏமாற்றி பதவிகளைப் பெற்றவர் அவர் அல்ல என்றும் அவர் சுட்டிக்காட்டினார். மஹிந்த ராஜபக்ச அவர்களின் அரசியல் தலைமையின் கீழ், இந்நாட்டில் நிலவிய 30 ஆண்டுகால கொடூரமான பயங்கரவாதத்தை முடிவுக்குக் கொண்டு வர சுரேஷ் சாலே போன்ற அதிகாரிகள் அளப்பரிய பங்களிப்பை வழங்கியுள்ளனர் என்றும், ஆனால் இன்று அவர் ஈவிரக்கமற்ற முறையில், அமானுஷ்யமாக நடத்தப்பட்டு சிறையில் அடைக்கப்பட்டுள்ளார் என்றும் சாகர காரியவசம் கவலை வெளியிட்டார்.
உயிர்த்த ஞாயிறு தினத் தாக்குதல் சம்பவத்துடன் தொடர்புடையவர் என்ற குற்றச்சாட்டிலேயே அவர் கைது செய்யப்பட்டுள்ளார் என்று தெரிவித்த அவர், இதற்கு முன்னர் இதேபோன்று கிழக்கு மாகாணத்தைச் சேர்ந்த பிள்ளையான் (சிவநேசத்துரை சந்திரகாந்தன்) என்பவரும் உயிர்த்த ஞாயிறு தாக்குதலுடன் தொடர்புடையவர் எனக் கூறி கைது செய்யப்பட்டு, பயங்கரவாத தடைச் சட்டத்தின் கீழ் ஓராண்டு காலம் சித்திரவதைக்கு உள்ளாக்கப்பட்டு சிறை வைக்கப்பட்டிருந்தார் என்பதை நினைவு கூர்ந்தார். ஆனால் இறுதியில், 2009 ஆம் ஆண்டுக்கு முன்னர் கிழக்கு பல்கலைக்கழக உபவேந்தர் காணாமல் போன சம்பவம் ஒன்றைக் காட்டியே அவர் நீதிமன்றத்தில் ஆஜர்படுத்தப்பட்டாரே தவிர, இன்றுவரை உயிர்த்த ஞாயிறு தாக்குதல் தொடர்பாக அவர் மீது எந்தவொரு குற்றச்சாட்டோ அல்லது ஆதாரங்களோ முன்வைக்கப்படவில்லை என்றும் அவர் கூறினார்.
தற்போது சுரேஷ் சாலே அவர்களும் அதே போன்றதொரு அரசியல் பழிவாங்கலுக்கு உள்ளாக்கப்பட்டுள்ளார் என்று குற்றம் சாட்டிய அவர், பயங்கரவாத தடைச் சட்டம் தவறானது எனக் கூறிக்கொண்டே தற்போதைய அரசாங்கம் ஆட்சிக்கு வந்தது என்றும், இந்நாட்டில் நிலவிய எல்.டி.டி.ஈ பயங்கரவாதத்தை ஒழிப்பதற்காகவே கடந்த காலத்தில் இந்த சட்டம் கொண்டுவரப்பட்டது என்றும் தெரிவித்தார்.
அன்று இச்சட்டத்திற்கு எதிராக கடுமையாக குரல் எழுப்பிய அநுர குமார திஸாநாயக்க அவர்கள், இன்று தனது சொந்த கையொப்பத்தைப் பயன்படுத்தி, அதே பயங்கரவாத தடைச் சட்டத்தின் கீழ் சுரேஷ் சாலேயை தடுத்து வைப்பதற்கான உத்தரவை பிறப்பித்துள்ளார் என்று அவர் சாடினார்.
உயிர்த்த ஞாயிறு தாக்குதல் என்பது இந்நாட்டில் நிலவிய நல்லாட்சி அரசாங்கத்தின் போது, தேசிய பாதுகாப்பு முழுமையாக சீர்குலைக்கப்பட்டிருந்த ஒரு பின்னணியிலேயே அரங்கேறியது என்பதை நாம் அனைவரும் அறிவோம் என்று தெரிவித்த சாகர காரியவசம், அதுமட்டுமன்றி, உலகின் மிகப்பலத்த புலனாய்வு அமைப்பான அமெரிக்காவின் எப்.பி.ஐ (FBI) கூட இது ஒரு இஸ்லாமிய தீவிரவாதிகளின் செயல் என்பதை தனது விசாரணை அறிக்கையின் மூலம் உறுதிப்படுத்தியுள்ளது என்றும் சுட்டிக்காட்டினார்.
இத்தாக்குதல் நடப்பதற்கு முன்னர், இவ்வாறானதொரு தாக்குதல் நாட்டில் நடக்கக்கூடும் என அப்போதைய நீதி அமைச்சர் விஜயதாச ராஜபக்ச பாராளுமன்றத்தில் எச்சரித்த போது, அதற்கு எதிராக சஜித் பிரேமதாச தரப்பில் இருந்த தீவிரவாத ஆதரவு குழுக்களே கூச்சலிட்டன என்றும், மேலும், இச்சம்பவங்கள் நடைபெறும் காலப்பகுதியில் சுரேஷ் சாலே இலங்கையிலேயே இருக்கவில்லை, அவர் தூதரகப் பணிகளுக்காகவும் பயிற்சிகளுக்காகவும் வெளிநாட்டிலேயே தங்கியிருந்தார் என்றும் அவர் தெளிவுபடுத்தினார்.
இலங்கை மண்ணிலேயே இல்லாத ஒரு அதிகாரியை, தற்போதைய ஜனாதிபதி தனது கையொப்பத்தைப் பயன்படுத்தி சிறையில் அடைத்து சித்திரவதை செய்வதன் பின்னணியில் பாரிய சதி ஒளிந்துள்ளது என்று தெரிவித்த அவர், தற்போதைய ஜே.வி.பி அரசாங்கம் ஆட்சிக்கு வருவதற்கு புலம்பெயர் எல்.டி.டி.ஈ டயஸ்போரா அமைப்புகளும், தீவிரவாத குழுக்களுமே ஆதரவு வழங்கின என்றும், அவர்களின் பிரதான நோக்கம் இந்நாட்டின் தேசிய பாதுகாப்பை முழுமையாக சீர்குலைப்பதாகும் என்றும் குற்றம் சாட்டினார்.
எதிர்காலத்தில் இந்நாட்டில் மீண்டும் ஒரு பிரிவினைவாதப் போராட்டம் உருவானால், அதற்கு எதிராக நாட்டை நேசித்து களமிறங்கக்கூடிய இராணுவ வீரர்களின் முதுகெலும்பை உடைப்பதே இந்த டயஸ்போரா அமைப்புகளின் தேவையாக உள்ளது என்றும், ஜனாதிபதி அநுர குமார திஸாநாயக்க அவர்கள், இந்த புலம்பெயர் பிரிவினைவாதிகளின் தேவைகளையே தற்போது நிறைவேற்றி வருகின்றார் என்றும் அவர் தெரிவித்தார்.
கடந்த கால பயங்கரவாதப் போரின் போது தலதா மாளிகை, ஸ்ரீ மகா போதி, காத்தான்குடி பள்ளிவாசல் மற்றும் அரந்தலாவ ஆகிய இடங்களில் பொதுமக்கள் மற்றும் பிக்குகள் கொடூரமாகக் கொல்லப்பட்டதை நாம் மறந்துவிடக் கூடாது என்று குறிப்பிட்ட அவர், அன்று சுரேஷ் சாலே போன்ற வீரர்கள் போராடியே இந்நாட்டிற்கு அமைதியைக் கொண்டுவந்தார்கள் என்றும், ஆனால் இன்று நாட்டைப் பாதுகாத்த வீரர்களை சிறையிலடைத்து, பிரிவினைவாதிகளின் தேவைகளை இந்த அரசு பூர்த்தி செய்கிறது என்றும் சாகர காரியவசம் தனது ஊடக சந்திப்பில் கடுமையாக சாடியுள்ளார்.