இலங்கையின் சமகால அரசியலில் தேசிய மக்கள் சக்தி (NPP) மற்றும் அதனை வழிநடத்தும் JVP, தென்னிலங்கைச் சூழ்நிலைக்கான ஒரு முக்கிய அரசியல் சக்தியாக உருவெடுத்து வருகிறது. இருப்பினும், தமிழ்த் தேசிய அரசியலின் நோக்கில் பார்க்கும்போது, இந்த அரசியல் அமைப்புகள் இன்னும் ஈழத் தமிழரை தனி தேசிய இனமாக அங்கீகரிக்கத் தயாராக இல்லை என்பது கவலைக்குரிய விடயமாகும்.
தமிழர் பூர்வீகமாக வாழ்ந்து வந்த வட–கிழக்கு பகுதி, வரலாற்று உண்மைகள் இருந்தபோதும், அரசியல் நோக்கில் துண்டிக்கப்பட்டு மணறாற்றை “வெலியோயா என்று பெயர்மாற்ற செயல்கள் மூலம் மக்கள்தொகைக் கட்டமைப்பு மாற்றப்பட்டுவிட்டது. இதனுடன், ஆறாம் திருத்த சட்டம், பயங்கரவாத தடுப்பு சட்டம் (PTA) போன்ற அடக்குமுறைச் சட்டங்கள் இன்னும் செயல்பாட்டில் உள்ள சூழலில், தமிழர்கள் தங்களது அரசியல் கோரிக்கைகளைச் சொல்வதற்கும் தற்காலில் எழுதுவதற்கும் கூடத் தடைகள் தொடர்கின்றன.
இந்த நேரத்தில் “இலங்கைத் தேசியத்தின் பங்காளிகளாக இணைந்துவிட வேண்டும்” என்ற அழைப்பு, தமிழரின் வரலாற்றுப்பூர்வ கோரிக்கைகளையும், தாயக அரசியல் நிலைப்பாடுகளையும் புறக்கணிக்கும் முயற்சியாகத் தோன்றுகிறது.
இளஞ்செழியனின் NPP இணைப்பு குறித்து எழும் அச்சம்
எந்த நபர் அரசியல் அமைப்பில் இணைவது அவர்களின் தனிப்பட்ட உரிமை என்றாலும், ஈழத் தேசியப் பார்வையில் முக்கியப் பாத்திரமாகத் திகழும் இளஞ்செழியன் போன்றவர்,
தங்களின் அடித்தள அரசியல் நிலைப்பாடுகளைப் புறக்கணித்து, தமிழரின் தாயகக் கோரிக்கையை மறுக்கும் ஒரு தென்னிலங்கை அரசியல் அமைப்பில் இணைந்தால், அது:
தமிழ்த் தேசியத்தின் வரலாற்று அனுபவத்துக்குப் புறம்பான ஒரு செயல்,
எதிர்கால அரசியல் வாய்ப்புகளுக்குப் பாதகமான ஒன்று,
தமிழினம் மீள முடியாத அளவிற்கு பலவீனப்படுத்தும் அரசியல் திசைமாற்றம் என்றே கருதப்படும்
இது ஒருவரை நபர்மைய குற்றவாளியாக சுட்டிக்காட்டும் நோக்கமல்ல;
தமிழினத்திற்கு வரும் நீண்டகால விளைவுகளை முன்வைக்கும் ஒரு அரசியல் எச்சரிக்கை.
சிங்கள தேசியவாதத்தின் புதிய உளவியல் யுத்தம்
தமிழர்களை உளவியல் ரீதியாகப் பிரித்து பலவீனப்படுத்தும் சிங்கள தேசியவாதத்தின் பழைய அரசியல் மாற்று வடிவத்தில்,
“அனைவரையும் ஒரே இலங்கைத் தேசியத்தில் கலந்து விட வேண்டும்” என்ற கருத்து மீண்டும் தூண்டப்படுகிறது. இதன் பின்னணியில்:
பூர்வீக நாகர்/இயக்கர் தமிழர்கள்,
மலையகத் தமிழர்கள்,
மதம் மாற்றிய தமிழர்கள்
என்ற மூன்று பிரிவுகளையும் ஒவ்வொன்றாகப் பிரித்து, ஒருங்கிணைந்த தமிழ்த் தேசிய சக்தியைச் சிதைக்க முயலும் நீண்டகால உத்தி நிலவுகிறது.
இந்த அணுகுமுறை, சிறீலங்கா என்ற ஒரே சிங்கள தேசத்தை நிலைநிறுத்தி, அதன் கீழ் தமிழர் முழுவதையும் இணைத்துவிடும் முயற்சிதான் என்பது மறைக்க முடியாத உண்மை.
தமிழரின் உண்மை நிலை
தமிழர் பூர்வீகமாக வாழ்ந்த வட–கிழக்கின் உரிமை கொண்டவர்கள், ஆங்கிலேய ஆட்சியால் மலையகத்திற்கு தொழிலாளர்களாக கொண்டுவரப்பட்ட தமிழக தமிழ் மக்களும் தமிழர்களே அவர்களின் வாரிசுகள் தமிழீழ மக்களே. மதம் மாறினாலும் இஸ்லாமியர்கள் மொழி, பண்பாடு, அடையாளம் மூலம் தமிழர்தான்
இவர்கள் அனைவரையும் ஒரே தேசிய இனமாக இணைக்கும் அரசியல் புரிதலே தமிழரின் பாதுகாப்பிற்கான வழி.
சிங்கள தேசியவாதத்திடம் சரணாகதி அடையும் அரசியலைத் தேர்வு செய்வது,
தமிழரின் வரலாறு, தாயக உரிமைகள், தன்னாட்சி உரிமைகள் அனைத்தையும் அழிக்கும் பாதையாக மாறும்.
அதனால், இந்த அணுகுமுறை இலங்கையின் நீண்டகால அமைதிக்கும் வழிவகுக்காது.
இளஞ்செழியன் போன்ற ஒருவர் NPP போன்ற அமைப்பில் இணைவது தனிநபர் முடிவு என்றாலும்,
அது தமிழ்த் தேசிய அரசியலின் அடிப்படை நோக்கங்களையும் தாயக உரிமைப் போராட்டத்தையும் பாதிக்கும் அபாயம் கொண்ட ஒன்று.
எனவே, இது ஒருவரை குறிவைக்கும் குற்றச்சாட்டு அல்ல;
தமிழினத்தின் எதிர்காலத்தைப் பாதுகாக்கும் அரசியல் எச்சரிக்கை!