ஓடும் புகையிரதத்துக்குள் மசாஜ்: இலங்கையில் நடந்த சம்பவம்!

சுற்றுலாப் பயணிகள் குழுவிற்கு புகையிரதத்தில் மசாஜ் சேவைகள் வழங்கப்படுவதைக் காட்டும் காணொளி தற்போது சமூக ஊடகங்களில் பரவி வருகிறது.

புகையிரத திணைக்களம் தற்போது இந்த காணொளியின் மீது கவனம் செலுத்தியுள்ளதாக திணைக்களத்தின் பொது முகாமையாளர் ஜே.‌ ஐ. டி. ஜயசுந்தர தெரிவித்தார்.

இந்த நடவடிக்கையால் புகையிரதத்துக்கு ஏதேனும் சேதம் ஏற்பட்டுள்ளதா என்பதை ஆய்வு செய்ய திணைக்களம் ஏற்கனவே நடவடிக்கை எடுத்துள்ளதாகவும் அவர் மேலும் கூறினார்.

பரிசோதனையின் போது ஏதேனும் சேதம் ஏற்பட்டமை தெரியவந்தால் புகையிரதத்தை முன்பதிவு செய்து வாங்கிய நிறுவனங்களிடமிருந்து அதற்குரிய நட்ட ஈட்டை மீட்டெடுக்க நடவடிக்கை எடுக்கப்படும் என்றும் திணைக்களத்தின் பொது முகாமையாளர் இன்று கொழும்பில் (17) நடைபெற்ற ஊடக சந்திப்பில் தெரிவித்தார்.

பிலிமத்தலாவையில் இருந்து கொழும்பு நோக்கி பயணிக்கும் புகையிரதத்தில் இந்த மசாஜ் சேவை வழங்கப்பட்டதாகவும், ஒரு தனியார் நிறுவனம் இந்த புகையிரதத்துக்கு பணம் செலுத்தி முன்பதிவு அடிப்படையில் எடுத்ததாகவும் தெரியவந்துள்ளது.

இருப்பினும், இந்த மசாஜ் சேவை குறித்து புகையிரத திணைக்களத்துக்கு எந்த தகவலும் தெரிவிக்கப்படவில்லை என்று தெரிவிக்கப்படுகிறது.

இருப்பினும், இந்தச் செயல் வழக்கமான புகையிரத சேவைகளில் நடக்கவில்லை என்றும், கட்டணத்திற்கு முன்பதிவு செய்யப்பட்ட சிறப்பு புகையிரதத்தில் நடந்ததாகவும் பொதுக் கண்காணிப்பாளர் மேலும் தெரிவித்தார்… இது குறித்து புகையிரத திணைக்களம் தீவிர விசாரணைகளை சுற்றுலாத்துறை பொலிஸாருடன் இணைந்து மேற்கொள்ளவுள்ளமை குறிப்பிடத்தக்கது…