எப்போதும் ருவீற்றரில் இருக்காமல் வெளியே போய் குடும்பத்தோடு நேரத்தை கழியுங்கள்!

என்ன நடந்தது என்று ருவீற்றர் நிறுவனம் விளக்கம் அளித்துள்ளது.

பயனாளி ஒருவர் நாளொன்றுக்குப் பார்வையிடுகின்ற பதிவுகளது எண்ணிக்கையைத் தற்காலிகமாக வரையறை செய்வதாக ருவீற்றர் நிறுவனத்தின் உரிமையாளர் எலென் மாஸ்க் (Elon Musk) தெரிவித்திருக்கிறார்.

தரவுகளை அணுகுவது உச்ச அளவுக்குச் செல்வதைத் தவிர்ப்பதற்காகவே இந்த வரையறை என்று அவர் தனது ருவீற்றர் பதிவு ஒன்றில் விளக்கம் அளித்திருக்கிறார்.

சதா முழு நேரமும் டிஜிட்டல் திரைகளோடு இருக்காமல் வெளியே சென்று குடும்பத்தவர்களைச் சந்திப்பதை இது ஊக்குவிக்கும் என்று மற்றொரு பதிவில் பல்தேசிய வர்த்தக பில்லியனராகிய அவர் குறிப்பிட்டுள்ளார்.

-இவ்வாறு எலென் மாஸ்க் தெரிவித்திருப்பது பயனாளர்களுக்குப் பெரும் ஆச்சரியமளித்துள்ளது.

ருவீற்றர் தளத்தை அணுகுவதில் பெரும் நெருக்கடி காணப்படுவதாக உலகெங்கும் இருந்து முறைப்பாடுகள் வெளிவந்த நிலையிலேயே இத் தகவலை அவர் வெளியிட்டிருக்கிறார்.

செயற்கை நுண்ணறிவு செயலிகளை (generative artificial intelligence models) உருவாக்குவதற்காகப் பயனாளர் தரவுகளை அணுகுவதில் சமூக ஊடகப் பெரு நிறுவனங்கள் மத்தியில் கடும் போட்டி எழுந்துள்ளது.

பயனாளர்களது பழக்கவழக்கங்களைச் சேகரித்து செயற்கை நுண்ணறிவு மாதிரிகளை உருவாக்குவதற்காக மூன்றாவது தரப்பினர்(third-party companies) ருவீற்றர் பயனாளர்களது தரவுகளைப்(data on user habits) பெருமெடுப்பில் அணுகுவதைத் தடுப்பதையே இந்த நடவடிக்கை உள் நோக்கமாகக் கொண்டது என்று சொல்லப்படுகிறது.