‘பயங்கரவாதத்திலிருந்து அரசைப் பாதுகாக்கும் மசோதா’ என்ற பெயரில் கொண்டுவரப்பட்டுள்ள அடக்குமுறைச் சட்டத்தை உடனடியாகத் திரும்பப் பெறுமாறு அரசாங்கத்தை வலியுறுத்தி, கொழும்பு ஜனாதிபதி செயலகத்திற்கு முன்பாக இன்று (13) பிரமாண்ட கவனஈர்ப்பு போராட்டமொன்று முன்னெடுக்கப்பட்டது.
பல்வேறு சிவில் அமைப்புகள், தொழிற்சங்கங்களின் பிரதிநிதிகள் மற்றும் அரசியல் செயல்பாட்டாளர்களின் பங்களிப்புடன் இப்போராட்டம் நடைபெற்றது.
முன்வைக்கப்பட்டுள்ள இந்தச் சட்டமூலமானது மக்களின் ஜனநாயக உரிமைகளையும் கருத்துச் சுதந்திரத்தையும் கடுமையாகப் பாதிக்கும் எனச் சுட்டிக்காட்டிய போராட்டக்காரர்கள், அடக்குமுறைச் சட்டங்களுக்கு எதிராக முழக்கங்களை எழுப்பியவாறு அரசாங்கத்திற்குத் தமது எதிர்ப்பைப் பதிவு செய்தனர்.
