1990-ல் அதிக நச்சுத்தன்மை கொண்ட பூச்சிக்கொல்லிகளுக்கு உகந்த முறையில் தடை விதிக்கப்பட்டதிலிருந்து இலங்கையின் தற்கொலை மரணங்களின் விகிதம் சுமார் 70% குறைந்துள்ளது என்று சுகாதார மற்றும் வெகுஜன ஊடக அமைச்சர் டாக்டர் நலிந்த ஜெயதிஸ்ஸ தெரிவித்தார். மேலும், அனைத்து நாடுகளும் தங்களின் தற்கொலை தடுப்பு உத்திகளில் பூச்சிக்கொல்லி கட்டுப்பாடுகளைச் சேர்க்க வேண்டும் என்றும் அவர் முன்மொழிந்தார்.
சுவிட்சர்லாந்தின் ஜெனீவாவில் நடைபெற்ற உலக சுகாதார அமைப்பின் 79-வது உலக சுகாதார மாநாட்டின் ஒரு பகுதியாக, “பூச்சிக்கொல்லிகளால் ஏற்படும் தற்கொலைகளைத் தடுத்தல்” என்ற தலைப்பிலான சிறப்பு அமர்வில் பங்கேற்றபோது அமைச்சர் இந்தக் கருத்துக்களைத் தெரிவித்தார்.
16ஆம் தேதி தொடங்கிய 79வது உலக சுகாதாரப் பேரவை, நாளை (23) வரை தொடரும். இதில், 194 நாடுகளைச் சேர்ந்த சுகாதார அமைச்சர்கள், தூதர்கள், பல்வேறு நிறுவனங்களின் பிரதிநிதிகள் மற்றும் பார்வையாளர்கள் உட்பட ஏராளமானோர் பங்கேற்றுள்ளனர்.
இந்த அமர்வை இலங்கை, கயானா, கென்யா, நைஜீரியா மற்றும் பாகிஸ்தான் ஆகிய நாடுகள் கூட்டாக ஏற்பாடு செய்திருந்தன. மேலும், உலக சுகாதார அமைப்பு, ஐக்கிய நாடுகள் சுற்றுச்சூழல் திட்டம் மற்றும் தற்கொலை மரணங்களை தடுப்புக்கான சர்வதேச சங்கம் ஆகியவையும் இதற்கு அனுசரணை வழங்குகின்றன.
1990-ஆம் ஆண்டு முதல், அதிக நச்சுத்தன்மை கொண்ட பூச்சிக்கொல்லிகளை உகந்த முறையில் தடை செய்ததன் மூலம் நாட்டில் தற்கொலைகள் சுமார் 70% குறைந்துள்ளதாகவும், இதுவே சிறந்த ஆதார அடிப்படையிலான சிறந்த விடயம் என்றும் அவர் குறிப்பிட்டார்.
மேலும், குறைந்த செலவில் குறுகிய காலத்தில் பலன்களை அளிக்கக்கூடிய வகையில் அனைத்து நாடுகளும் தங்களின் தற்கொலை தடுப்பு உத்திகளில் பூச்சிக்கொல்லி கட்டுப்பாட்டைச் சேர்க்க வேண்டும் என்று தாம் முன்மொழிவதாக அமைச்சர் தனது கருத்துக்களைத் இதன்போது தெரிவித்தார்.
இந்தப் பணிகளுக்காக வளர்ந்து வரும் நாடுகளுக்கு தொழில்நுட்ப மற்றும் கொள்கை ரீதியான ஆதரவை வழங்குவது உலக சுகாதார அமைப்பு (WHO) மற்றும் ஐக்கிய நாடுகள் சுற்றுச்சூழல் திட்டம் (UNEP) போன்ற அமைப்புகளுக்கு இன்றியமையாதது என்றும், இலங்கை தனது அனுபவங்களை மற்ற நாடுகளுடன் பகிர்ந்து கொள்ள எப்போதும் தயாராக உள்ளது என்றும் அமைச்சர் குறிப்பிட்டார்.
மேலும், தற்கொலை மரணங்களை தடுக்க பூச்சிக்கொல்லிகளைக் கட்டுப்படுத்துவது மட்டும் போதாது என்றும், சமூக அடிப்படையிலான சுகாதார சேவைகள் வலுப்படுத்தப்பட வேண்டும் என்றும், இலங்கை தற்போது ஆரம்ப சுகாதாரப் சேவையை வலுப்படுத்துவதன் மூலம் இதைச் செய்து வருகிறது என்றும் அவர் கூறினார்.
பூச்சிக்கொல்லி கட்டுப்பாட்டுக் கொள்கையை உலக சுகாதார அமைப்பின் (WHO) வழிகாட்டுதல்களில் சேர்ப்பதும், உறுப்பு நாடுகளைத் தங்கள் தேசியத் திட்டங்களில் அதைச் சேர்க்க ஊக்குவிப்பதும் இந்த அமர்வின் முக்கிய நோக்கமாகும்.
தற்கொலைகளைக் குறைப்பதில் இலங்கை தற்போது உலக அளவில் முன்னணியில் உள்ளது. 1995-ல் ஒரு இலட்சத்திற்கு 47 ஆக இருந்த தற்கொலை விகிதம், 2022-க்குள் 14 ஆகக் குறைந்துள்ளது.
நச்சுப் பூச்சிக்கொல்லிகள் மீதான தடையே இதற்குக் முக்கியக் காரணம் என்று இங்கு தெரியவந்துள்ளது. இதற்கிடையில், தற்கொலைத் தடுப்புக்கான சர்வதேச சங்கம் (IASP) தனது 34-வது தற்கொலைத் தடுப்பு உலக மாநாட்டை 2027-ல் இலங்கையில் நடத்தத் திட்டமிட்டுள்ளதாகவும் இங்கு குறிப்பிடப்பட்டது.