மஹர சிறைச்சாலையில் விளக்கமறியலில் வைக்கப்பட்டுள்ள முன்னாள் அமைச்சர் ஜொன்ஸ்டன் பெர்னான்டோவை நேரில் சந்தித்து அவருக்கு புத்தாண்டு வாழ்த்துக்களைத் தெரிவிப்பதற்காக நாடாளுமன்ற உறுப்பினர் நாமல் ராஜபக்ச இன்று வருகை தந்து அவரது உடல்நிலை மற்றும் நலம் குறித்து விசாரித்தார். இந்தச் சந்திப்பின் பின்னர் ஊடகங்களுக்குக் கருத்துத் தெரிவித்த அவர், தற்போதைய அரசாங்கம் தமக்கு வழங்கப்பட்டுள்ள மக்கள் ஆணையை முறையாகப் பயன்படுத்தத் தவறிவிட்டு, கடந்த காலங்களைப் போலவே அரசியல் பழிவாங்கல்களில் தீவிரமாக ஈடுபட்டு வருவதாகக் குற்றம் சுமத்தினார்.
தேர்தல் காலத்தில் மக்களுக்கு வழங்கிய வாக்குறுதிகளை நிறைவேற்ற முடியாமலும், பொருட்களின் விலை உயர்வு உள்ளிட்ட பொருளாதார நெருக்கடிகளால் மக்கள் எதிர்கொள்ளும் பிரச்சினைகளைத் தீர்க்க முடியாமலும் அரசாங்கம் திணறி வருவதாக அவர் சுட்டிக்காட்டினார்.
இவ்வாறான அரசாங்கத்தின் தோல்விகளில் இருந்து மக்களின் கவனத்தை திசைதிருப்பவே, முன்னாள் அமைச்சர்கள் மற்றும் அரசியல்வாதிகளைத் திட்டமிட்ட முறையில் சிறையில் அடைக்கும் நாடகத்தை அரசாங்கம் அரங்கேற்றி வருவதாக அவர் சாடினார்.
விளக்கமறியலில் வைக்கப்பட்டுள்ள ஜொன்ஸ்டன் பெர்னான்டோ மிகவும் உறுதியான மனநிலையில் இருப்பதாகவும், அரசியல் ரீதியான இவ்வாறான சவால்களைத் தாம் முன்னரும் எதிர்கொண்டுள்ளதால் இது தமக்குப் புதிய விடயமல்ல என்றும் நாமல் ராஜபக்ச தெரிவித்தார்.
தாங்கள் ஒருபோதும் நீதிமன்றத்தை விமர்சிக்கப் போவதில்லை எனவும், சட்டத்தின் முன் அனைவரும் சமம் என்பதை ஏற்றுக்கொள்வதாகவும் குறிப்பிட்ட அவர், அரசியல் நோக்குடன் முன்னெடுக்கப்படும் இவ்வாறான கைதுகளுக்கு எதிராக நீதிமன்றம் உரிய நீதியை வழங்கும் எனத் தாம் முழுமையாக நம்புவதாகவும் தெரிவித்தார்.
கடந்த ரணில் விக்கிரமசிங்கவின் அரசாங்கம் எவ்வாறு பழிவாங்கல் அரசியலை முன்னெடுத்ததோ, அதே பாதையிலேயே தற்போதைய ஆட்சியாளர்களும் பயணிப்பதாகத் தெரிவித்த அவர், இவ்வாறான நடவடிக்கைகள் மூலம் மக்களின் உண்மையான பிரச்சினைகளை மறைக்க முடியாது எனவும் வலியுறுத்தினார்.
பதிவு செய்யப்படாத ஆடம்பர வாகனத்தைப் பயன்படுத்தியதாகக் கூறப்படும் குற்றச்சாட்டின் கீழ் ஜொன்ஸ்டன் பெர்னான்டோ கைது செய்யப்பட்டுள்ள நிலையில், இந்த விஜயம் அரசியல் வட்டாரங்களில் முக்கியத்துவம் பெற்றுள்ளது.