கொழும்பில் தொடரும் பலத்த மழை: வளிமண்டலவியல் திணைக்களம் விடுத்துள்ள எச்சரிக்கை!
C.G.Prashanthan Sri Lanka - Colombo Reporter for MEIVELI

கொழும்பு மாவட்டத்தில் இன்று (அக்டோபர் 22, 2026) தொடர்ந்து பெய்து வரும் பலத்த அடை மழை காரணமாக மக்களின் இயல்பு வாழ்க்கை கடுமையாக பாதிக்கப்பட்டுள்ளது.
வளிமண்டலவியல் திணைக்களத்தின் சமீபத்திய தரவுகளின்படி, கொழும்பு மாவட்டத்தில் ஏற்கனவே 133 மில்லிமீட்டர் வரை மிக பலத்த மழை பதிவாகியுள்ளது.
இடியுடன் கூடிய இந்த பலத்த அடை மழை தொடர்ந்து நீடித்து வருவதுடன், மாலை மற்றும் இரவு வேளையிலும் அடுத்தடுத்து பலத்த மழை பெய்யக்கூடும் என எச்சரிக்கப்பட்டுள்ளது.
இன்றைய தினத்தில் வெப்பநிலை அதிகபட்சமாக 28°C ஆகவும், குறைந்தபட்சமாக 24°C ஆகவும் பதிவாகியுள்ளது.
மேலும், மணிக்கு 10 முதல் 15 மைல் வேகத்தில் தென்மேற்கு திசையிலிருந்து காற்று வீசக்கூடுவதுடன், கடலோரப் பகுதிகளில் காற்றின் வேகம் மணிக்கு 50 கி.மீ வரை அதிகரிக்க வாய்ப்புள்ளதாகவும் தெரிவிக்கப்பட்டுள்ளது.
தொடரும் இந்தச் சீரற்ற காலநிலையால் நகரின் முக்கிய வீதிகள் பலவற்றில் தேங்கியுள்ள நீரால் கடுமையான வாகன நெரிசல் ஏற்பட்டுள்ளது.
தாழ்வான பகுதிகளில் தற்காலிகமாக ஏற்படும் திடீர் வெள்ளப்பெருக்கு மற்றும் பலத்த மின்னல் தாக்கங்கள் குறித்து பொதுமக்கள் அதிக எச்சரிக்கையுடன் இருக்குமாறு அறிவுறுத்தப்பட்டுள்ளதுடன், கொழும்பு உட்பட 11 மாவட்டங்களுக்கு தேசிய கட்டிட ஆராய்ச்சி நிறுவனத்தினால் (NBRO) விடுக்கப்பட்ட நிலம் தாழ்தல் மற்றும் மண்சரிவு எச்சரிக்கையும் தொடர்ந்தும் அமலில் உள்ளது.
அத்துடன், நாளையும் கொழும்பு உள்ளிட்ட மேல் மாகாணத்தின் பல பகுதிகளில் 100 மில்லிமீட்டருக்கும் அதிகமான மிக பலத்த மழை பெய்யக்கூடும் என வளிமண்டலவியல் திணைக்களம் எச்சரித்துள்ளது.
இதனால், அவசியமான தேவைகளுக்காக மட்டுமே பாதுகாப்புடன் பயணிக்குமாறும், சாத்தியமான சந்தர்ப்பங்களில் வெளிப்பயணங்களைத் தவிர்த்து வீடுகளிலேயே பாதுகாப்பாக இருக்குமாறும் பொதுமக்கள் கேட்டுக்கொள்ளப்படுகிறார்கள்.

