சவூதி அரேபியாவில் மரண தண்டனை விதிக்கப்பட்டுள்ள கல்முனையைச் சேர்ந்த தமிழ் இளைஞரின் மரண தண்டனையை ரத்து செய்ய நடவடிக்கை எடுக்குமாறும், யாழ்ப்பாணத்தில் அமைக்கப்பட்டுள்ள திலீபனின் வெண்கலச் சிலை மற்றும் எல்.டீ.டீ.ஈ (LTTE) அமைப்பை ஊக்குவிக்கும் செயற்பாடுகளைத் தடுக்குமாறும் வலியுறுத்தி ‘சிங்ஹல ராவய’ தேசிய அமைப்பு ஊடக சந்திப்பொன்றை நடத்தித் தனது கருத்துக்களை வெளியிட்டுள்ளது.
இவ்வூடக சந்திப்பில் உரையாற்றிய ‘சிங்ஹல ராவய’ தேசிய அமைப்பின் தலைவரான வணக்கத்திற்குரிய அக்மீமன தயாரத்ன தேரர், சவூதி அரேபியாவில் மரண தண்டனை விதிக்கப்பட்டுள்ள கல்முனைப் பகுதியைச் சேர்ந்த தமிழ் இளைஞரின் உயிரைக் காப்பாற்றுவது குறித்துக் கருத்துத் தெரிவித்தார்.
மனிதநேய அடிப்படையில் குறித்த இளைஞருக்கு விதிக்கப்பட்டுள்ள மரண தண்டனையைத் தளர்த்துவதற்குத் தேவையான இராஜதந்திர தலையீடுகளை இலங்கை அரசாங்கம் உடனடியாக மேற்கொள்ள வேண்டும் என அவர் வலியுறுத்தினார்.
அத்துடன், யாழ்ப்பாணத்தில் தமிழீழ விடுதலைப் புலிகள் அமைப்பின் முன்னாள் உறுப்பினர் திலீபனின் உருவத்தை வெண்கலச் சிலையாக வடித்துள்ளமை குறித்தும், எல்.டீ.டீ.ஈ அமைப்பை மீண்டும் ஊக்குவிக்கும் வகையிலான செயற்பாடுகள் குறித்தும் தேரர் தனது கடுமையான எதிர்ப்பைப் பதிவு செய்தார். நாட்டின் சட்டத்தையும் அமைதியையும் சீர்குலைக்கும் வகையில் இவ்வாறான பிரசாரங்கள் இடம்பெறுவதை உடனடியாகத் தடுப்பதற்கு உரிய அதிகாரிகள் நடவடிக்கை எடுக்க வேண்டும் என்றும் அவர் கோரிக்கை விடுத்தார்.
இதனைத் தொடர்ந்து உரையாற்றிய ‘சிங்ஹல ராவய’ தேசிய அமைப்பின் செயலாளரான மதுபாஷண பிரபாத் ரணஹங்ச, நாட்டின் தற்போதைய சமூக மற்றும் அரசியல் நிலைமைகள் குறித்துத் தனது கருத்துக்களைப் பகிர்ந்துகொண்டார்.
நாட்டின் இறையாண்மையைப் பாதுகாப்பதன் முக்கியத்துவத்தையும், தீவிரவாதக் கருத்துக்கள் மீண்டும் தலைதூக்குவதைத் தடுப்பதற்கான சட்ட ரீதியான நடவடிக்கைகளின் அவசியத்தையும் அவர் தனது உரையில் சுட்டிக்காட்டினார்.