கலால் வரித் திணைக்களத்தின் உயர் அதிகாரிகளின் முறைகேடுகள் மற்றும் ஊழல்களுக்கு எதிர்ப்பு தெரிவித்து, ராஜகிரியாவில் அமைந்துள்ள அதன் தலைமை அலுவலகத்திற்கு முன்பாக சமூக ஆர்வலர்கள் குழுவினர் கண்டனப் போராட்டம் ஒன்றில் ஈடுபட்டனர்.
இப்போராட்டத்தின் போது, சுயதொழில் சங்கத்தின் தலைவரும் சமூக ஆர்வலருமான பிரதீப் சார்ல்ஸ் ஊடகங்களுக்கு கருத்து தெரிவிக்கையில்,
கலால் வரித் திணைக்களத்தின் தற்போதைய ஆணையாளர் பிரேமரத்ன மற்றும் ‘வி&ஏ’ (V&A) மதுபான நிறுவனத்தின் உரிமையாளர் வஜிர குணசேகர ஆகியோருக்கு இடையில் இருக்கும் சட்டவிரோத நெருக்கம் குறித்து கடுமையான குற்றச்சாட்டுகளை முன்வைத்தார்.
கலால் வரி ஆணையாளர் பிரேமரத்ன, அண்மையில் சொகுசு ‘வெசல்’ ரக மோட்டார் வாகனம் ஒன்றை வாங்கியுள்ளதாகவும், இதற்கான நிதி அவருக்கு எவ்வாறு கிடைத்தது என்பது குறித்து பின்னால் உள்ள லஞ்ச ஊழல் விபரங்களுடன் உடனடியாக விசாரணை நடத்தப்பட வேண்டும் என்றும் அவர் வலியுறுத்தினார்.
சோளத்தைக் கொண்டு தயாரிக்கப்பட வேண்டிய மதுபானங்களை, வஜிர குணசேகரவின் ‘வி&ஏ’ நிறுவனம் அதிக லாபத்தை நோக்கமாகக் கொண்டு சர்க்கரையைப் பயன்படுத்தி தயாரித்து வருவதாகவும், இந்த மோசடிகளை மூடிமறைக்கவே கலால் வரி ஆணையாளர் அவருக்குத் துணை போகிறார் என்றும் அவர் குற்றம் சாட்டினார்.
மேலும், தற்போதைய நிதி அமைச்சரின் தாயார் மறைந்த போது, அதற்கான அனைத்து செலவுகளையும் இந்த மதுபான நிறுவன அதிபர் வஜிர குணசேகரவே ஏற்றுக்கொண்டுள்ளதன் மூலம் அரசாங்கத்தின் உயர் மட்டத்தினரையும் இவர்கள் தங்களது கட்டுப்பாட்டுக்குள் வைத்துள்ளனர் என்பது தெளிவாகிறது என அவர் குறிப்பிட்டார்.
இந்த ஊழல் நெட்வொர்க்கை அம்பலப்படுத்த, பிரதி நிதி அமைச்சர், கலால் வரி ஆணையாளர் மற்றும் வஜிர குணசேகர ஆகிய மூவரின் தொலைபேசி அழைப்பு விபரங்களை ஜனாதிபதி உடனடியாகப் பெற்று விசாரணை செய்ய வேண்டும் எனக் கோரிய அவர், இந்த ஒட்டுமொத்த லஞ்ச ஊழல் மற்றும் முறைகேடுகள் குறித்து இலஞ்ச ஊழல் ஒழிப்பு ஆணைக்குழுவிடம் முறையான ஆவணங்களுடன் புகார் அளிக்கப்பட்டுள்ளது என்றும் தெரிவித்தார்.
எதிர்வரும் ஆகஸ்ட் மாதத்தில் பெரிய அளவிலான திட்டங்களைச் செயல்படுத்துவதாகக் கூறி, நாட்டில் உள்ள நடுத்தர மற்றும் சிறு அளவிலான சுயதொழில் வியாபாரிகளின் வயிற்றில் அடிக்கும் செயலில் இந்த ஆணையாளர் ஈடுபட்டு வருகிறார் என்றும் பிரதீப் சார்ல்ஸ் சாடினார்.
தகுதியற்ற நபர்களை இத்தகைய உயர் பதவிகளில் அமர்த்துவதை விடுத்து, திணைக்களத்தில் உள்ள தகுதியான அதிகாரிகளுக்கு இந்த பதவியை வழங்க வேண்டும் என வலியுறுத்திய அவர், ஜனாதிபதி இதில் உடனடியாக தலையிட்டு இந்த ஊழல்வாதிகளை பதவியிலிருந்து நீக்க வேண்டும் என்றும், இல்லையெனில் அடுத்த கட்டமாக கடுமையான மரணச் சவப்பெட்டி மற்றும் மலர்வளையங்களை ஏந்திய போராட்டங்கள் திணைக்களத்திற்கு முன்னால் வெடிக்கும் என்றும் எச்சரித்தார்.
