தமிழக வெற்றிக் கழகத்தின் பெண் நிர்வாகியான ரஞ்சனா, அக்கட்சியின் தலைவர் விஜய்க்கு விடுத்துள்ள நேரடி எச்சரிக்கை அரசியல் களத்தில் பெரும் பரபரப்பை ஏற்படுத்தியுள்ளது. அரசியல் மேடைகளில் ‘ஓம் சக்தி பராசக்தி’ என்று அடுக்கு மொழியில் உணர்ச்சிவசப்படப் பேசுவது மட்டும் ஒரு தலைவருக்கு அழகல்ல என்று அவர் விமர்சித்துள்ளார். ‘தலைவர் எதைச் செய்தாலும் அது சரிதான் என்று கண்ணை மூடிக்கொண்டு ஆதரித்த ரசிகர்கள், தற்போது விஜய்யின் செயல்பாடுகளால் மிகுந்த ஏமாற்றத்தில் இருக்கிறார்கள்’ என்று அவர் வேதனையுடன் தெரிவித்துள்ளார். குறிப்பாக, ஒரு மக்கள் தலைவருக்கு தனிமனித ஒழுக்கம் என்பது மிக முக்கியமானது என்றும், அதில் விஜய் அவர்கள் உடனடியாகக் கவனம் செலுத்தித் தன்னைச் சரிசெய்து கொள்ள வேண்டும் என்றும் ரஞ்சனா வலியுறுத்தியுள்ளார். ‘குடும்ப மாண்பையும், தனிமனித ஒழுக்கத்தையும் கடைபிடிக்கத் தவறினால், வரும் தேர்தலில் தமிழக மக்கள் விஜய்க்கு உரிய பாடத்தைப் புகட்டுவார்கள்’ என்று அவர் பகிரங்கமாக எச்சரித்துள்ளார். கட்சியின் உள்விவகாரங்கள் மற்றும் தலைவரின் தனிப்பட்ட வாழ்க்கை குறித்து ஒரு பெண் நிர்வாகியே இப்படித் துணிச்சலாகப் பேசியிருப்பது தவெக வட்டாரத்தில் அதிர்வலைகளை உருவாக்கியுள்ளது.