இலங்கையின் கலைத்துறைக்கு பெருமை சேர்க்கும் வகையில், 16 வயது இளம் ஒளிப்படக் கலைஞரான ஜெய்ரின் அன்ரன் , 2026 ஆம் ஆண்டுக்கான Sony World Photography Awards போட்டியின் உலகளாவிய இறுதிப் பட்டியலில் இடம்பிடித்து சாதனை படைத்துள்ளார். உலகம் முழுவதும் 200க்கும் மேற்பட்ட நாடுகளிலிருந்து சமர்ப்பிக்கப்பட்ட 4 இலட்சத்து 30 ஆயிரத்துக்கும் அதிகமான படைப்புகளில் இருந்து தேர்ந்தெடுக்கப்பட்ட ஜெய்ரின், இப்போட்டியின் இளைஞர் பிரிவில் முதல் 10 இடங்களுக்குள் தெரிவாகிய முதல் இலங்கையர் என்ற பெருமையை பெற்றுள்ளார். ஜெய்ரின் அன்ரன் சமர்ப்பித்த ‘Keep it Clean!” ‘ என்ற தலைப்பிலான ஒளிப்படம், தனது தோகையை நேர்த்தியாகச் சீர்செய்யும் ஒரு கம்பீரமான மயிலின் அழகிய தருணத்தை உயிரோட்டமாக பதிவு செய்துள்ளது.
இயற்கையின் நுட்பமான அழகையும், சுற்றுச்சூழல் விழிப்புணர்வையும் ஒருங்கிணைத்த இந்தப் படைப்பு, நடுவர் குழுவின் கவனத்தை ஈர்த்துள்ளது. லண்டனில் அமைந்துள்ள நேஷனல் போர்ட்ரெய்ட் கேலரி உள்ளிட்ட புகழ்பெற்ற கலை நிறுவனங்களைச் சேர்ந்த நிபுணர்கள் அடங்கிய சர்வதேச நடுவர் குழுவினால் இந்தப் படம் தேர்வு செய்யப்பட்டுள்ளது. குறிப்பாக ரூபி ரீஸ்-ஷெரிடன் உள்ளிட்ட அனுபவமிக்க கலை விமர்சகர்கள் ஜெய்ரினின் படைப்பாற்றலை பாராட்டியுள்ளனர்.தற்போது 19-ஆவது வயதில் அடியெடுத்து வைக்கும் சோனி வேர்ல்ட் போட்டோகிராபி விருதுகள், சமகால ஒளிப்படக் கலைக்கான உலகின் மிகவும் செல்வாக்குமிக்க மற்றும் மதிப்புமிக்க போட்டிகளுள் ஒன்றாக கருதப்படுகிறது. இறுதிப் பட்டியலில் இடம்பிடித்துள்ள கலைஞர்களில் ஒருவராக, ஜெய்ரின் அன்ரனின் ஒளிப்படம், லண்டனில் அமைந்துள்ள புகழ்பெற்ற சோமர்செட் ஹவுஸ் அரங்கில் 2026 ஏப்ரல் 17 முதல் மே 4 வரை நடைபெறும் சர்வதேச கண்காட்சியில் காட்சிப்படுத்தப்பட உள்ளது. கொழும்பு – 4, புனித பீட்டர்ஸ் கல்லூரி மாணவரான ஜெய்ரின் அன்ரனின் இந்தச் சாதனை, இலங்கையின் இளம் தலைமுறையின் கலைத் திறனையும், உலகளாவிய கலை அரங்கில் நாட்டின் வளர்ந்து வரும் இடத்தையும் வெளிப்படுத்தும் ஒரு முக்கியமான மைல்கல்லாக கருதப்படுகிறது. இளம் வயதிலேயே உலக அரங்கில் தடம் பதித்துள்ள ஜெய்ரின் அன்ரனின் இந்தப் பயணம், எதிர்காலத்தில் இன்னும் பல உயரங்களைத் தொட வாழ்த்துகளுடன் எதிர்பார்க்கப்படுகிறது.