இன்றைய போட்டியில் ஹைதராபாத் அணியும், பெங்களூரு அணியும் ஹைதராபாத்தில் உள்ள ராஜீவ் காந்தி மைதானத்தில் மோதியது. இப்போட்டியில் நாணய சுழற்சயில் வென்ற பெங்களூர் அணி முதலில் துடுப்பெடுத்தாட தீர்மானித்தது. அதன்படி முதலில் களம் இறங்கிய பெங்களூரு அணி 20 ஓவர் முடிவில் 7 விக்கெட் இழந்து 206 ஓட்டங்கள் எடுத்தனர்.
இதில் அதிகபட்சமாக தொடக்க வீரர் விராட் கோலி 51 ஓட்டங்களும் , ரஜத் படிதார் 50 ஓட்டங்களும் , கேமரூன் கிரீன் 37* ஓட்டங்களும் எடுத்து கடைசி வரை களத்தில் இருந்தார். ஹைதராபாத் அணியில் ஜெய்தேவ் உனத்கட் 3 விக்கெட்டையும், நடராஜன் 2 விக்கெட்டையும் பறித்தனர். ஹைதராபாத்தில் தொடக்க வீரர்களாக டிராவிஸ் ஹெட், அபிஷேக் ஷர்மா இருவரும் களமிறங்கினர்.
முதல் ஓவரின் கடைசி பந்தில் டிராவிஸ் ஹெட் 1 ஓட்டம் எடுத்து கரண் சர்மாவிடம் பிடி கொடுத்து வெளியேறினார். அடுத்து ஐடன் மார்க்ரம் களமிறங்க அதே நேரத்தில் மறுபுறம் இருந்த தொடக்க வீரர் அபிஷேக் ஷர்மா அதிரடியாக விளையாடி 13 பந்தில் 31 ஓட்டங்கள் குவித்து 4 -வது ஓவரில் விக்கெட்டை இழந்தார்.
அடுத்த ஓவரில் ஐடன் மார்க்ரம் 7 ஓட்டங்களையும் , அடுத்து களமிறங்கிய நிதிஷ் ரெட்டி 13 ஓட்டங்களிலும் , அதிரடி வீரர் ஹென்ரிச் கிளாசென் 7 ஓட்டங்களிலும் , அப்துல் சமத் 10 ஓட்டங்களிலும் விக்கெட்டை பறிகொடுத்து பெவிலியன் திரும்பினர். இதனால் ஹைதராபாத் அணி 85 ஓட்டங்களுக்கு 6 விக்கெட்டை பறிகொடுத்தனர்.
அடுத்து வந்த கேப்டன் பாட் கம்மின்ஸ் 11 -வது ஓவரில் தொடந்து 2 சிக்ஸர் விளாசினார். அதிரடியாக விளையாடிய கம்மின்ஸ் 15 பந்தில் 31 ஓட்டங்கள் எடுத்து கேமரூன் கிரீனிடம் பிடி கொடுத்து நடையை கட்டினார். இருப்பினும் மத்தியில் இறங்கிய ஷாபாஸ் அகமது நிதானமாக விளையாடி 40* ஓட்டங்கள் எடுத்து கடைசிவரை களத்தில் ஆட்டமிழக்காமல் இருந்தார்.
இறுதியாக ஹைதராபாத் அணி 20 ஓவரில் 8 விக்கெட்டை இழந்து 171 ஓட்டங்கள் எடுத்தனர். இதனால் பெங்களூரு அணி 35 ஓட்டங்கள் வித்தியாசத்தில் வெற்றி பெற்றது. பெங்களூரு அணியில் அதிகபட்சமாக ஸ்வப்னில் சிங், கரண் சர்மா, கேமரூன் கிரீன் தலா 2 விக்கெட்டை பறித்தனர். இதுவரை பெங்களூரு அணி 9 போட்டிகளில் விளையாடி உள்ளது. அதில் 2 போட்டியில் வெற்றியும், 7 போட்டியில் தோல்வியும் தழுவி உள்ளது.
அதே நேரத்தில் ஹைதராபாத் அணி 8 போட்டிகளில் விளையாடி 5 போட்டியில் வெற்றியும், 3 போட்டிகளில் தோல்வியும் தழுவி உள்ளது. தொடர்ந்து 6 போட்டிகளில் தோல்வி தழுவி வந்த பெங்களூரு அணி இன்றைய போட்டியில் வெற்றி பெற்றுள்ளது என்பது குறிப்பிடத்தக்கது.